Mas di 400 artista di munti área sta partisipa na 14º idison di Noite Branca ki ta kuntisi es sábado, na Praia.
Festa di Natal e di passagem d’anu, ki ta inklui feira e fogo di artifiisu, sta kusta 30 mil kontu, e di valor, 11 mil kontu sta gastadu na Noite Branca, ki es anu, sta ominagea 50 anu di indipendensia di Kabu Verdi.
Atividadi sta kuntisi na seti palku ku musika, dansa, arti visual, tiatru e stand up comedy.
Sinema di Praia ta risebi stand up comedy ku atuason di Henrique Alhinho, Nito de Taresa, Jailson Miranda, Elton Ezeiruaku, Iven Cidário, Ruben Barros, Kompas Andrade, Boca Fradu, Jando Mendes, Beatriz Lúcio, Delmar Teixeira, Cíntia Pereira e Flor.
Na Avenida Amicar Cabral sta montadu Palku Jovem ku atuason di 25 artista, entri es Zé Grogu e Dibongo, Ló de Pina, Ga Dalomba, David Brazão, Sandro Monteiro, Vha Bulla, Puto Fox, CJey Patronato e Vanessa Ssaneva.
Na zona Ténis, públiku ta disfruta di Palku Dansa ku ritmu tradisiunal sima, Batuque, Funaná e Kotxi Pó. Inda ta subi palu, Elísio Gomes, Tuna Tavares, Rabenta, Xibiote, Lino Semedo, Albertino Évora, Sté Mandela e Joshua Marty.
Inda dentu di prugramason di Noite Branca, Prasa Alexandre Albuquerque na Plateau sta risebi Fera di Artisanatu e Salon Nobri di Kambra di Praia sta akolhi xpusison di artifatu di Natal.