Na Són Visênti, grupu Flores do Mindelo, últimu klassifikadu di karnaval 2019, ê 1º ki ta disfila, dia 25 dess mês, ku téma “Lenda di um civilizasôn mítiku”. Sugundu agremiasôn, ki dêbi entra vinida, 30 minutu dipôs, ê Cruzeiros do Norte, detentôr di títulu di kampiôn di karnaval 2019, ku enredo “Tudo a dois”.
Tersêru ki ta entra na Rua di Lisboa ê Monte Sossego, ki foi 2º klassifikadu na 2019, ku tema “Nôs terra – mitu, kontu e lenda”. Vindos do Oriente, ki anu passadu disisti di disfila, ê quartu grupu ki ta disfila ku enredu “ Em busca da pedra filosofal”. E últimu ki ta disfila ê Estrelas do Mar, ki konkista 3º lugar na 2019. Ê ta lêba pa vinida tema “Estrelas de nôs mar, tartaruga marinha”.
Pa festa di rei momo dess anu na São Salvador do Mundo, câmara lukal dja dispunibiliza 350 kontu. Di kêl valor dispunivel 240 kontu ê pa subsidia kês quatu grupu ofisial di konselhu e 150 kontu ê pa prémiu e ôtus dispéza rilasionadu ku logistika.
Êss anu festa di rei momo nakêl munisipiu tem komu nobidadi disfili di recém-kriadu grupu di karnaval Flores di Somada. Keli ê pruméru bez ki grupu stá sai e ês stá bai aborda téma “Herdeirus di Áfrika”.
Na Praia, grupu Estrela da Marinha, di Terra Branca, stá lêba pa vinida tema “Preservaôn di spési marinhu e beleza na fundu mar”. Ku 300 figuranti e dôs karru alegóriku, grupu ta pretêndi môstra beleza di fundu di mar na quatu ala. Na 2019, grupu disidi partsipa na disfili ofisial pamodi falta di dinhéru.
Ôtu grupu di praia ki djá anunsia tema di disfili dess anu ê Vindos d’África. Ês ta lêba pa vinida téma “Criação ao caos” pa retrata alguns passagem di biblia sobri Apocalipse. Grupu di Txadinha, ki ta karrêga títulu di penta kampiôn di karnaval di Praia, djá kumêsa insaiu. Vindos d’África ta pretêndi lêba pa vinida quatu ala, cada um divididu na oito bloku.