Ku música “Diz só”, kabu-verdiana Kady Araújo txiga na fázi final di Fistival da Canção. Kady didika si apuramentu pa falecido artista Jorge Neto.
Música ki Kady konkori kuêl ê um kompudisôn di Dino de Santiago ku letra di Kalaf Epalanga.
Final stá markadu pa kuntisi próximu Sábado, 7 di Março, e vensidôr stá bai riprisênta Purtugal na Fistival Eurovisão da Canção, na mês di Maio, na Roterdão, Holanda.
Tambê apura êss final di simana Jimmy P, Tomás Luzia e Elisa Rodrigues. Kês artista li ta djunta ku kês pruméru semi-finalista: Tiago Nacarato/Bárbara Tinoco, Marta Carvalho/Elisa, Filipe Sambado e Throes+The Shine.
Fistival da Canção ê um konkursu anual prumuvidu pa RTP, désdi 1964 ku objetivu di silesiona um cancão pa Fistival di Eurovisão.