Elton Renato Livramento Barros ê nómi d’igreja di Fufura. Um djugadôr di futiból kabu-verdianu ki désdi 2014 stá djuga na Islândia mas si sónhu ê um dia riprisênta Tubarões Azuis.
Jovem ki kumêsa si perkursu profissional na Mindelensi, ikipa di Són Visênti nundi ki atleta nási txiga Islândia na 2014.
Fufura txiga nakêl país nordiku pa fazi um testi na ikipa di 2º divisôn di Selfoss. Tudu kóri dêtu, ê kaba pa fika lá pa dôs temporada.
Na 2016 avansadu muda pa ikipa di Haukar tambê di 2º divisôn, nundi ê fika três ánu. Na 2019 ê muda pa Keflavik, tambê di 2º divisôn e êss anu ê sina ku Reynir.
Atualmenti si ikipa stá na 2º lugar di kampiunatu islandês di 4ª divisão. Êss simana ês ta djuga ku 3º lugar e na kazu di vitória ês ta fika a um pontu pa garanti passagem pa 3º divisôn. Ness temporada Fufura djá marka 10 gôlu na 13 djogu.
Fufura flá ma si prusessu di adaptasôn na Islândia ká foi difisil. Ê adapta fáxi a futiból más físiku e parti más difisil foi inkara frio, pamodi kumunika ê disgadja na inglês. Pa tudu kabu-verdianu Fufura ta deseja garra e determinasôn pa nu luta kontra Covd 19.