Músika Herança, di prujetu Kaialas, interpretadu pa kabu-verdianu Plácido Vaz e poeta brasiléru Alvaro Tallarico stá entri kes 30 selesiunadu pa BDO Live Festival Portugal. Plácido Vaz ê úniku partisipanti di África na eventu.
Plácido Vaz, ki nasi na Santiago e ki gossi ta vivi na Portugal, tem fetu txeu show na Oropa, undi si karrera na músika tem kodjedu txeu frutu. Êl ku brasiléru Alvaro konshi lá mê na Purtugal, na sidadi di Porto e ês djunta pa trabadja Prujetu Kaialas, ki ta mustura musika di Kabu Verdi, Brasil e Purtugal.
Pa kabu-verdianu ê um ligria stá na Top 30 di BDO kum músika ki ta pretendi engrandêsi mustura cultural e spisialmênti raíz afrikanu.
BDO Live Festival kumesa na fim di Fevrêru e músika Herança ta streia oji na canal di YouTube di BDO Live Fistival pa 8 óra nôti – ora di Kabu Vêrdi.
Ta gánha kenha ki tiver más votu e pa vôta basta entra na site di eventu. Vensidor di BDO Live Festival ta tem um ikipa pa produzil si musika.