Ness sugunda fêra ta silebradu Dia Nasiunal di Kultura e di Kumunidadi. Tambê ta kumimoradu 154 anu di nascimentu di jornalista, skritor e poeta kabu-verdianu Eugénio Tavares.
Na Són Visênti, Alaim, Academia Livre de Artes Integradas di Mindelo, ta realiza um demostrasôn di núcleo di ballet clássico e ôtu di skola di música di mestri Mick Lima.
Kintu idisôn di Fistival Internasiunal di Tiatru di Atlântiku (TEARTI) ta ranka oji na kapital ku lema “Korda Kauberdi”, num omemanagem a grupu kultural Korda Kauberdi, fundadu pa Francisco Fragoso, ku objetivu di promôvi tiatru genuinamenti kabu-verdianu.
Idisôn dess anu, ki ta kuntisi ti dia 26 dess mês ta konta ku partsipasôn di grupus di Purtugal, Angola e Brasil.
Num parceria ku Biblioteca Nasiunal, e Kâmara di Praia, ideia ê invôlvi skolas di país ku izibisôn di peça Chiquinho.
Ti fim di mês ta kuntisi na Parque 5 di Julho Atividadi ki txôma Park D’Art ku objectivu di insentiva kriasôn di um spásu dinâmiku ku atividadi kuletivu e individual. Stá programadu fêra di artesanatu, gastronomia, fêra di planta ornamental, formasôn di arti dekorativu e artesanato e ofisina di arti pa inklusôn di jovens.
Inda pa silebra Dia Nasiunal di Kultura stá previstu pa dia 20 dess mês na Praia um kombersu abertu sobri poeta, jornalista e scritor Ovídio Martins ki tambê essa nu ta kompletaba 93 anu.