Serka di 200 artista di artes cénicas, performativu e di dança, di 14 país, ta stá presenti, a partir di oji, na 27º idisôn di Fistival Internasiunal di Tiatru di Mindelo – Mindelact 2021.
Eventu, ki ta kuntisi di oji ti dia 15 dess mês, ta konta ku 67 spetákulu, inclusive alguns streia mundial.
Ness idisôn txomadu di idisôn Sperança, pamodi situasôn di pandemia, praticamenti tudu spetákulu ta ser presensial e organizasôn ta distaka forti presença di kontinenti afrikanu, ku peça di Kabu Vêrdi, Angola, Senegal, África do Sul, Togo e Quénia.
Oji ta subi palku principal, na Centro Cultural di Mindelo, peça A Aurora Negra, ku Cleo Diára (Purtugal), Isabél Zuaa (Angola) e Nádia Yracema (Kabu Vêrdi).Spetákulu, ki ta fala di mudjêr negra na Purtugal,djá foi premiadu pa Teatro Dona Maria II.