Silesôn kabu-verdiana di basketbol sénior maskulinu ta txiga Angola oji (18) nundi ta kuntisi kês 1º djogu di fazi di qualifikasôn pa Mundial 2023.
Atletas di Kabu Vêrdi ta fazi uns dias di stágiu na Luanda e dipôs ês ta viaja pa Benguela nundi ês ta djuga ku Nigéria, Uganda e Mali dia 26, 27 e 28 dês mês.
Selesionadôr Emanuel Trovoada djá divulga lista di konvokadus: Basi ê: Hugo Correia e Silva, Jeff Xavier e Xane da Rosa. Kês Extremu ê: Anderson Gomes, Ivan Almeida, Joel Almeida, Fidel Mendonça e Luís Teixeira. Na pusisôn di Posti ta stá: Keven Gomes, Michel Gomes, Aiton Marques e Amarilson Lopes.
Gigante Edy Walter Tavares ká ta podi stá presenti pamodi kompromissu ku si ikipa na Euroliga.
Ôtu atleta ki ka konsigui stá presênti ê Sékou Ba, pamodi um lesôn e tambê Flávio Fonseca, Giany Spencer e Hugo Pereira ki stá na fazi di inskrisôn na Fedrasôn Internasiunal di Basketbol. E Vitor tambê pamodi kistôn di logística ê ka ta podi partsipa: sô ê ta pudia txiga Angola dia 25 dess mês pa dia 2 ê stá logu na Argentina pa sês kumprumissu na Liga Sul-merkanu.