Silesôn sénior maskulinu di Kabu Vêrdi subi 26 lugar na Ranking Afrikanu di Basketbol e góssi ê stá na top 10 di kontinênti.
Subida na rankind, ilaboradu pa Fedrasôn Internasiunal di Basketbol, ê justifikadu pa excelenti dizempenhu di kabu-verdianus na Afrobasket, ki kuntisi há 3 mês na Ruanda nundi Kabu Vêrdi fika na 4º lugar.
Ranking di kês midjôr silesôn di basketbol na Áfrika ê lideradu pa Nigéria siguidu pa Tunísia e Angola. Top 10 ta fika kompletu ku silesôn di: Senegal, Costa di Marfim, Egipto, Camarões, Marrocos, Mali e Kabu Vêrdi na 10º lugar.
Kabu Vêrdi foi país afrikanu ki más subi na ranking. Kês ôtu país ki más subi foi: Guiné Conacri ki subi 19 lugar, Uganda e Sudão do Sul ki subi 12 kada kenha.
E na tabela mundial, lideradu pa Estadus Unidos siguidu pa Spánha e Austrália, Kabu Verdi stá na pusisôn 74.
Silesôn femininu di basketbol di Kabu Vêrdi stá na pusisôn 13, na tabela lideradu pa Nigéria, atual kampiã afrikana. Senegal stá na 2º lugar e Mali na 3º.
Moçambique, Angola, Egipto, Camarões, Costa di Marfim, Repúblika Demikrátika do Congo e Quénia ta fitxa top 10 femininu afrikanu.
Na lista mundial Kabu Vêrdi stá na pusisôn 88 e lista mundial ê lideradu pa Merka, Spánha e Austrália.