“Mestre Paulino Vieira”, “Piduca” e “Julinha”, ê três livru biográfiku skritu pa artista e prussôr Agostinho Lopes ki t’aprisentadu oji pa 1º bez na Kabu Vêrdi.
Aprisentasôn na Biblioteka Nasiunal ê propostu komu um atividade itinerânti. Livrus, ki góssi stá txiga Kabu Vêrdi já foi aprisentadu na Holanda, Itália e Luxemburgo.
Di akordu ku autor livru “Mestre Paulino Vieira” ê um desabafu di Paulino Vieira sobri sês tristeza e trauma.
“Piduca” ta fala di vida di um ómi kabu-verdianu ki dexa si ilha, Són Visênti, na 1964, ku 22 ánu d’idadi, pa djobi um vida midjor.
E “Julinha”, ta fala di um mudjêr kabu-verdiana ki imigra pa Itália e dipôs pa Roterdão e supera alguns problema sima abusu, violência e diskriminasôn.
Autôr Agostinho Santos ê di Saniklau mas désdi 12 anu kê ta vivi na Holanda. Êl ê formadu na Rekursus humanos, Gistôn di prujetu e sugurança d’impresa. Tambê ê trabadja komu realizador e apresentador di Rádiu e Tlivisôn na Roterdão.