Na Santiagu Sul Bola pa Frenti gánha EFSOD na final na penalti. Na tempu regulamentar djogu fika 1 igual.
Ikipa EFSOD, di Txadinha Pires, ki tambê konkista prémiu di fair play deseja sorti pa ikipa vensidôra e ês diseja ki ikipa di Santiagu Sul ta konkista tasa nasiunal.
Na Santiagu Norti Gremio Nhagar derrota ADEC di Kalheta pa 1 – 0 e pa pruméru bez ê sta bai riprisenta region norti di Santiago na Nasiunal Sub 17.
Na Fogo, Akadémika gánha Sumbango di Mustero pa 3 – 1 e ê konkista regiunal. Ikipa garanti ma ês stá priparadu pa fazi mutu midjor na nasiunal.
Kampiunatu Nasiunal di Futiból Sub-17 stá programadu pa kuntisi di 25 dês mês ti 8 d’ abril, na Praia e Mindelo.
Na tutal djá sta definidu 8 di kês 11 kampiôn regiunal sub 17. Kês ôtu ê: detentor di títulu: EFIZ di Sal e Gaviões tambê di Sal, Solpontense di Santantôn Norti, Académica di Santantôn Sul, Batuque di Són Visênti y Ultramarina di São Nicolau.