Ónti kumitiva nasiunal ki stêvi na Costa di Marfim ta riprisenta Kabu Vêrdi na CAN foi resebidu pa sentenas di pessoas n’Oroportu di Praia, ku batukada e festa bedju.
Dipôs di recepsôn n’Oroportu karrus dixi na disfili pa Estadiu na Várzia nundi tevi atuasôn di Ferro Gaita, SOS Mucci e Tikai.
Silesionador nasiunal, Bubista, mostra satisfasôn ku si ikipa e ê rekunhêsi ma inda ikipa tem spasu pa midjora.
Apesar di ka fika sabi pamodi Tubarões Azuis ka txiga meias-finais, Bubista flá inda ma ikipa mostra ma ê pôdi disputa djogu ku kalker ikipa e ma ê pôdi ganha.
Bubista inda agradêsi adeptus e ê pidi pa nu kontinua ta akredita e konfia na nôs silesôn.
Gilson Benchimol, um di kês más novu na silesôn flá ma ê tem orgulhu di fazi parti di “Família CV”. Inda ê flá ma ês dá tudu pa riprisenta sês nasôn e báxa kabésa ê sô pa beija nôs símbolo.
E Vozinha, um di kês más experienti, ki djá passa pa quatu idisôn di CAN, flá, na si página na rêdi susial, ma ganha um CAN era maior e más ambisiosu sonhu di si karrêra. Ka foi possível, mas ê skrebi inda ma “Sonho foi bonitu enquanto ê dura”.