Désdi dumingu ki Tubarões Azuis stá na Purtugal ta pripara pa duplu amistôsu kontra Argélia e Andorra.
Oji grupu ta viaja pa Argélia pa djogu di dia 1 di Junho markadu pa 8 óra nôti – horariu di Kabu Vêrdi – num stádiu ki ta kebi 70 mil alguém.
E dia 2 di Junho ikipa ta volta pa Purtugal pa infrênta Andorra – djogu previstu pa 2 hora di Kabu Vêrdi ta kuntisi num stadiu ku kapasidadi pa 3 mil alguém.
Uniôn di ikipa
Grupu skodjedu pa Rui Aguas djá stá quasi kompletu stá falta só Arcanjo Júnior ki inda stá na duvida sê ta djuga ô não pamodi um prublema gástriku.
Avançadu di Akadémika di Porto novo, Amarildo Monteiro más konshedu pa Xolote viaja ónti nôti pa Purtugal pa trena ku kês ôtu konvokadu di Rui Águas pa djogu amigável kontra Argélia e Andorra.
Xolote ê úniku djugadôr ki ta vivi na Kabu Vêrdi konvokadu pa djogus markadu pa dia 1 e dia 3 di Junhu. Rapazinhu di 27 anu stá lidêra lista di midjôr markadôr di kampiunatu nasiunal dêss épuka.
Ikipa téknika tambê dja stá reforçadu ku sirbisu di Arlindo Morais, ki ta vivi na Holanda.
Homenagem
Duranti djogus di Tubarões Azuis kontra Argélia e Andorra, Fedrasôn kabu-verdiana di futiból t’omenagia 1º silesôn nasiunal di futiból ki realiza si 1º djogu há 40 anu.
Pa omenatgia grupu, ikipa nasiunal stá bai entra kampu ku kor di ikipamentu uzadu pa 1º sileson nasiunal – um ikipamentu verdi e branku.