Treinador Jorge Conceição más konshedu pa Djodje djá divulga lista di konvokadu pa fazi di qualifikasôn di Campiunatu Afrikanu di Nações (CAN) sub 17.
Bazi di konvokadu stá na atletas ki konkista midalha di prata na 11º idisôn di Jogos Desportivos di CPLP, ki kuntisi mês passadu na São Tome e Príncipe.
Konsentrasôn ta kumêsa sexta-fêra na Estádiu Nasiunal e ta bai ti dia 31 dêss mês – dia ki kumitiva nasiunal ta viaja pa Sinegal nundi ê ta fazi mas um simana di stágiu antis di prova.
Qualificação pa CAN Tanzânia 2019 ta kuntisi na sitémbru na Senegal e Kabu Vêrdi stá na grupu C di Zona Oesti djuntu ku Guine e Mauritânia.
Streia d’ arquipélagu ta kuntisi dia 11 di Sitembru kontra Mauritânia e dia 13 Kabu Vêrdi ta djuga ku Guine.
Convokadus
Kê konvokadu ê di rigiôn disportivu di Són Visênti (10), Santiago Sul (4), São Nicolau (3), Sal, Fogo e Boa Vista tem um kada.
Minins konvokadu di Són Visênti ê: Fock, Rivaldo, Cavôl e Edú di Batuque, Wety (Juventude), Maky, Kéu e Badiu di Cantareira, Patch di Real Sociedade e Palass di Zona Libertada.
Di Santiago Sul: Kévin e Wilson di Atleta de Cristo, Hélio di Maracanã e Délcio di EPIF. Di Santiago Norte stá Karan e Amoury di Escola de Tarrafal e Rony di Calheta.
Konvokadu di Sal ê Idú di EFIH, di Boa Vista konvokadu ê Bruno di Sporting e di Fôgu ê Erickson di Académica.