Stá abértu inskrisôn, na site di organizasôn, pa tradisiunal Kurrida di Liberdadi markadu pa dia 13 dês mês.
Êss anu pa pruméru bez prova di 21 kilómetru e 10 kilómetru ta kuntisi em simultâniu, na sirkuitu fitxadu na ladu sul di Cidadi, ku dôs volta.
Na tudu dôs sirkuitu perkursu ê Palmarejo-Várzia e prova di 10 kilómetru ê didikadu pa atleta ki ká ê profissional e pa tudu amanti di atletismo.
Na kurrida jovem dêbi partsipa alunu di tudu skóla d’ensinu sukundáriu di ilha di Santiago e Marcha/Caminhada, ku sérka di 4 kilómetru, ê didikadu pa criança e idosu.
Pa kês pruméru klassifikadu na meia-maratona, maskulinu e femininu, prémiu ê di 150 kontu. Pa 10 kilómetru e paraolímpiku prémiu ê di 20 kontu, na 100 metru paraolímpiku/kadeiranti prémiu ê di 10 kontu e pa skola e kurrida jovem ta dadu matrial disportivu.
Idisôn dêss anu stá orçadu na 10 mil kontu e stá speradu partsipasôn di 5 mil alguém, sendu ki 450 ê atleta.