Djá stá tudu prontu pa nonu idisôn di Cabo Verde Music Awards, ki ta kuntisi manhãn di nôti na Sembleia Nasiunal, ku léma “A nossa música, os sons das nossas ilhas”.
Nêss idisôn ta ser konsidradu trabadju lansadu entri 1 di Janéru e 31 di Dizembru di 2018 e trabadju stá konkorri na 17 katiguria.
Ess anu, na si rúbrika Responsabilidadi Susial, eventu stá apoia, ku parti di dinheru di benda di bilheti, vítimas di ciclone Idai na Moçambique.
Humorista kabu-verdianu Carlos Andrade e aprisentadôra di RTP Africa, moçambikana Vanessa Figueiredo ê kês aprisentador di gala.
Na gala artista kombidadu pa atua ê: guineensi Yasmine e Charbel, angulanu Don Kikas e kabu-verdianu Gaby Baessa.
Lucibela Santos ê artista más nomiadu na idisôn dêss anu – kantôra tem 5 nomiasôn. Si traz stá Dudu Araújo e Roy Rob ku 4 nomiasôn kada kenha, Nancy Vieira, Djodje, Elji, Rapaz 100 juiz e Loony Johnson ta disputa prémius na 3 katiguria kada kenha.
E kês sinku personalidade skodjedu pa resêbi menos honrosa ê jornalista Moisés Évora, DJ Straga Beat, Kompositor Daniel Spencer, Rapper Batchart e Antero Simas. Tudu anu iventu ta distaka alguns figura nasiunal ki tem kontribuidu pa dsenvolvimentu susial e kultural di país.