Djá sai sorteiu pa Mundial 2021 e Kabu Verdi stá na Grupu A djuntu ku Alemanha, três bez kampiôn di mundu, Hungria ki djá partsipa na 20 mundial e Uruguai ki sima Kabu Verdi stá partsipa pa 1º bez.
Na streia di Kabu Verdi, na maior palku di Andebol Mundial, ikipa ta ser komandadu pa memu ikipa tékniku ki lebanu a konkista 5º lugar na CAN 2020, lideradu pa trenadôr purtuguês José Tomás.
Vigésimu sétimu idisôn di mundial di andebol stá previstu pa kuntisi di 14 ti 31 di Janéru na Egito ku partsipasôn di 32 silesôn divididu na 8 grupu. Kontinenti afrikanu ta stá riprisentadu pa 8 silesôn.
Na mês di Nuvembru, di dia 2 ti dia 8, silesôn nasiunal ta kumêsa pripara pa prova kum stágiu na Purtugal.