Tudu prontu pa oitavu idisôn di Cabo Verde Music Awards – gala ki ta kuntisi manhãn, dia 5, na Sembleia Nasiunal tem komu léma ta kria mimória désdi 2011.
Luso-kabu-verdianu Carlão e angulanu Eduardo Paim é kes artista konbidadu pa atua na 8º idison di eventu. Mas di 20 artista sta konkorri pa prémiu na 17 katiguria – Inda tem sinku mensôn honrosa – ki indikadu diretamenti pa júri presididu pa Mário Bettencourt, más konshedu pa Russo – e atribuison di prémiu karrera.
Artista Solidário
Ga DaLomba ê artista silesionadu pa resêbi Menção Honrosa na katiguria Artista Solidáriu di Kabu Vêrdi Music Awards 2018.
Katiguria ta distaka artista/ músiku e kompusitôr ki kontribui pa dzinvolvimentu susial, kumunitáriu e pa igualdadi atravéz di sês trabadju.
Prémiu pa rapper Ga DaLomba ê pamódi trabadju kê tem stadu ta fazi komu ativista susial pa kombati konsumu di alcool e droga.
Menção Honrosa
Kompusitôr Betu ê artista skodjedu pa resêbi Menção Honrosa na katiguria Kompusitôr di CVMA 2018. Na 2012 ê gánha prémiu di Midjôr Kompusitôr.Katiguria ta premia, tudu anu, um personalidade ki ta distaka komu um kriadôr di excelênsia. Menção ê um forma di rekunhêsi karrêra di músiku e rakorda sês grandi kompusisôn kompostu prinsipalemnti pa morna – kandidata a Património Imatrial di Humanidadi.
Radialista José Fonseca Soares ê skodjedu pa resêbi Menção Honrosa na katiguria Prufissiunal di kumunikasôn susial.
Fatboy ta resêbi menção honrosa na katiguria DJ – keli ê um katiguria ki ta premia DJ ki ta distaka na promosôn e divulgasôn di músika kabu-verdiana. Na 1º idisôn di Deejay Awards Kabu Vêrdi, ki kuntisi êss anu, Fatboy konkista prémiu di DJ popular di Anu e Midjor DJ di Músika Iletrónika.
Responsabilidadi Susial
Êss anu eventu ta apoia Skóla di Músika di Aldeias SOS, na Ribeirão Chiqueiro, São Domingos – um inisiativa ki ta ensina músika pa criança e jovem e lebás a xprimi através di arti komu forma di inklusôn susial e kria valor.