Pa komimora 20 anu di karrera, Djodje lansa Mininu Di Oru. Sugundu artista novu álbum ta konta stória di inisiu di si karera ti gossi.
Na trabadju di 15 faxa, bu ta fazi un viagi pa músika tradisonal di kabu verdi ku mustura d´otus ritmu afrikanu kantadu na kriolu musturadu ku português y inglês. Pa grava es disku Djodje fazi un retiru na Kabu Verdi, ku otus artista sima, Gerson Marta, Mário Marta, Kady Araújo, Alberto Konig, Diego Neves, Ga da Lomba, Luciano Santos y Manu Reis.
Na kada som nu ta fazi un viagi, undi kada letra ta lebanu pa un lugar. Interessanti des álbum, ê ki kuazi na tudu músika Djodje ta kanta na Kriolu di Kabu Verdi y di Guiné-Bissau, terra di si mai.
Ês trabadju ê un kazamentu perfeitu di letra, voz, melodia, ritmu y instrumental, undi kada faxa ta komplementa kelotu, stória kantadu ki bu ta sakuta, kanta, badja y identifika ku kada letra. Bu ta xinti ma pa fazi es trabadju djodji fazi un introspeson, undi ke ta mostra modi ke ganha maturidade nes 20 anu di karrera, ê fazi jus a nomi ke dá álbum, ê mostra ma el ê mininu d´oru, un embaxador di músika di Kabu Verdi.