Ikipa téknika di Silesôn Nasiunal lideradu pa a Silvéria Nédio, mas konshedu pa Nita, djá aprisenta 1º konvokatória di ikipa nasiunal pa djogu dia 16 dêss mês na kapital – na estádiu da várzia – kontra sileson di Guiné-Bissau.
Stagiu di priparasôn ta kumêsa próximu sábadu quandu tudu atleta nasiunal ta txiga kapital – mininas di ikipa adversáriu ta txiga dia 14 dêss mês.
Kês konvokada ê sô atleta ki ta djuga na Kabu Vêrdi – silesionadôra ta justifika kel eskolha li pamodi tempu – ka ta dá tempu pa atletas di diaspora bem pa pripara ku kês ki dja stá li.
Nita flá inda ma ê krê pripara grupu pa aprisenta um bom futiból, ku bom nível tátiku e tékniku ku txeu responsabilidadi e fair play.
Pa guarda-redis txômadu: Dirvania Araújo di Mindelensi (Són Visênti) e Jacinta Rodrigues di FC Llana (Sal).
Diféza ê: Edy Mara dos Santos e Varsénia da luz di Mindelensi (Són Visênti), Lariza Rocha di FC Llana (Sal), Danilea Levy di Dorense FC (Sal), Eleonara dos Santos di Atletas di Cristo (Santiago) e Joseane Fernandes di Seven Stars (Santiago)
Meiu kampu ê: Maria Cabral e Lúcia Moniz di Seven Stars (Santiago),
Simónica Duarte di Black Panthers (Santiago), Jocilene Martins e Caroly Tomar di FC Llana (Sal).
Avançada ê: Lais Spencer e Silvana Santos di FC Llana (Sal), Ronise Monteiro di Atletas de Cristo (Santiago), Ivania Moreira di Seven Stars (Santiago), Wendy Cristy Fonseca di Mindelensi (Són Visênti), Irlanda Lopes di Águias Vermelhas (Fogo); Elisiane Semedo – Adec (Santiago); Yarine da Graça Neves e Loide Miranda di Madeirense (Són Visênti).