O Pequeno Rasul ê títulu di livru ki ta lansadu êss Kinta-fêra na sala di konfrênsia di Biblioteka Nasiunal, na Praia.
Keli ê pruméru trabadju di Akil de Sousa fêtu em ko-autoria ku Andreia Tavares.
Na livru infantil autor ta konta aventura di Rasul, um feijãozinhu ki stá djobi kuzê kê pôdi fazi pa sakva si aldeia di um longu periudu di seka – um aventura inspiradu na realidade di munti país afrikanu undi munti alguém ta luta tudu dia pa um gota d’agu.
Dupla tambê ta txôma atensôn pa necessidade di valoriza raiz cultural komu um impurtanti ferramenta pa konstrui identidade di criança.
Kênha ê autor di livru?
Akil de Sousa ki si nómi di batismu ê Carlos Vieira ê fidju di kabu-verdianu ki nánsi na Purtugal. Êl ê licenciadu na Design e Tecnologia di Artes Gráficas e mestri na Design Editorial.
E co-autora Andreia Tavares ki nansi na Santiago ta studa Kumunikasôn Susial na Purtugal.