Futibolista egípsiu Mohamed Salah ilegedu pa sugundu bez konsekutivu Midjôr Djugadôr Afrikanu d’Anu.
Djugadôr di Liverpool, ki resêbi 64% di kês 194 votu, sa ta disputaba prémiu ku si kolega d’ikipa, senegalês Sadio Mané ki têvi 22% e ku gabonês di Arsenal, Pierre-Emerick Aubameiyang ki resêbi 14% di votus.
Na si diskursu, durante sirimónia di intréga di prémiu na Dakar, Salah flá ma prémiu ê txeu impurtanti pa êl, ma désdi pikinóti kê ta sunha kuêl e góssi djê gánhal dôs bez. Avansadu di 26 anu didika prémiu pa si família, kolega d’ikipa e adeptus. Prémiu tambê didikadu pa si país, Egipto.
Na femininu, sul-afrinaka Chrestinah Kgatlana foi ileita midjôr djugadôra d’anu na kontinênti. Si compatriota Desiree Ellis distinguidu komu midjôr trenadôra dipôs di lêba África do Sul pa final di CAN. Na maskulinu francês Hervé Renard, ki ta dirigi silesôn di Marrocos, votadu komu midjôr tékniku d’anu.
Prémiu di midjôr ikipa femininu bai pa Nigéria e maskulinu bai pa Mauritânia.