Silesôn kabu-verdiana di andebol maskulinu ta streia na kampiunatu mundial 2021 kontra Hungria na djogu markadu pa dia 15 di janéru, na Egipto.
Dôs dia dipôs ikipa kabu-verdiana ta volta pa quadra pa infrênta tri kampion di mundu, Alemanha.
E dia 19 djogu ê kontra Uruguai, ikipa ki sima Kabu Verdi tambê sa ta bai pa si pruméru mundial.
Ikipa Mutivadu
Silesionadôr nasiunal di andebol maskulinu flá ma si ikipa stá bai mundial pa kumpiti ku garra.
Konscienti ki pandemia ta difikulta trabadju di ikipa, José Tomaz flá inda ma ê stá bai trabadja ikipa nasiunal pa pruvêta di midjôr forma pussivel di spiririênsia di mundial.
Além di ser um oportunidadi di prêndi ku kês midjôr di mundu, trenadôr purtuguês flá inda ma objetivu ê dá dignidadi pa silesôn.
Kabu Verdi stá partsipa pa 1º bez na kumpitisôn ki ta kuntisi di 14 ti 31 di Janéru di próximu anu na Egipto.
Mundial ta konta ku partsipasôn di 32 silesôn divididu na 8 grupu. Kontinenti afrikanu ta stá riprisentadu pa 8 silesôn.