Êss fim di simana Akadémika di Praia konkinsta pa pruméru bez Kampiunatu di Kabu Vêrdi dipôs di gánha Mindelense pa 2 – 0.
Kês gôlu di ikipa di kapital markadu na sugundu parti di prolongamentu pa Ró na minutu 103 e Mike marka sugundu gôlu na últimus minutu.
Apesar di keli ser 1º troféu di Akadémika, ikipa komandadu pa Lito Aguiar txiga final na 2004 kontra Sal-Rei di Boa Vista e na 2009 ku Sporting di Praia.
Prémiu individual
Djugadôr Romario Váz, más konshedu pa Ró, di Akadémika di Praia, konsidradu Midjôr Djugadôr di Kampiunatu Nasiunal.
Xolote, di Akadémika di Porto Novo, gánha Midjôr Markador di Kampiunatu, ku 7 gôlu.
Lito – trenadôr di Akadémika di Praia – gánha troféu di Midjôr Trenadôr, Cachito tambê di Akadémika di Praia ileitu Midjôr Guarda-rêdis e Akadémika di Porto Novo distinguidu ku troféu Fair Play.
Pa midjôra Kampiunatu Nasiunal di futiból
Fedração Kabu-verdiana stá trabadja pa tem a partir di épuka 2018/2019 um novu mudélu na kumpitisôn.
Anunsiu foi fêtu pa prisidênti di Fedrasôn, Mário Semedo ki flá ma ideia ê aperfeiçoa sempri pa midjôra kada bez más, mas ê ká avança detalhe di nóvu figurinu.