Kantôra kabu-verdiana Neuza de Pina ta lansa êss sexta-fêra na kapital si nóvu disku: “Badia di Fogo” ta bem ku 10 músika.
Artista ki stá na kabu Vêrdi ta promôvi trabadju flá ma disku sa ta tem bom aseitasôn di públiku ki djá duraba ansiosu ta spera. “Artista tem um responsabilidade ku públiku e keli ê um bom sinal – ta mostra ma nha pruméru trabadju foi bom”.
Na kêl disku li “tem um Neuza más madura, más sértu di kuzê kin krê”. Na “Badia di Fogo”, kantora ki ta revela apaixonadu pa músika tradisiunal flá mê kontinua na mému stilu.
Karru-chéfi di trabadju ta bem ku mésmu nómi di disku. “Badia di Fogo ê um músika ku txeu stória, skritu pa mim. Stória ê ki nha mai, na leitu di morti, dá nha madrinha mim pa krian. N tinha um kriolu fundu, diferenti di minins di zona di nha madrinha e minins ta manga di mim ta txoman sanpadjuda, barriga batata, korasôn di barata. Ês ta txoman Badia di Fôgo pamodi n nansi na Lém Katxor”. Na épuka Neuza ta brigaba mas oji ê ta atxal interessante tanto kê pol na músika. “Êss stória torna um arti. N ta agradêssi minins”.
Neuza kumêsa ta skrebi sês kompusisôn ku 16 anu mas nunca ê têvi coragi d’aprisentás e na disku li ta bem ku quatu kompusisôn di sêl.