Abertura di idisôn dêss anu di Fistival Internasiunal di Tiatru di Mindelo – Mindelact ê oji ku peça De Marfim e Carne – As estátuas também sofrem di kabu-verdiana Marlene Freitas.
Êss anu kabu-verdiana distinguidu ku Leão de Prata – Prémiu di karrêra di Bienal di Dança di Veneza na Itália.
Ti dia 11 dêss mês ilha ta resêbi 60 spetákulu di grupu tiatral di Kabu Vêrdi, Brasil, Alemanha, Argentina, Cuba, Spanha, Purtugal, Merka, Repúblika cheka, Angola, Uruguai, Gana, França e Marrocos.
Idisôn dêss anu ta antesêdi Bodas di Prata di eventu pur issu organizasôn ka stá txômal di vigésimu quartu idisôn e sim di idisôn 25 ménus um.
Além di spetákulu stá previstu alguns formasôn e workshop ku grandi nómi di tiatru mundial. Alguns di kês nomi ki ta dá formasôn ê brasiléra Vera Holtz, cheko Radim Vizvar e kritiku Ruy Filho tambê di Brasil.
Tudu artista djá stá na ilha. E sima ta kuntisi tudu anu Mindelact, konsidradu um di kês maior eventu di artes cénicas di país, tem um stensôn na Praia ku 5 spetákulu.
Pruméru idisôn di Mindelact kuntisi na 1995 sô ku grupos di Són Visênti e santantôn, na 1996 ê lêba grupu di quasi tudu ilha e na 1997 ê internacionaliza.