Oji ta silebradu dia nasiunal di kultura e di kumunidadi ku munti atividadi sima spusisôn di arti, disfili di tabank e kolá san jon, passeata pa omenagia Eugénio Tavares, serenata, palestra, atuasôn musikal e sinema.
Oji tambê ta kumimoradu 151 anu di nasimentu di jornalista, skritôr e poeta kabu-verdianu Eugénio Tavares.
Kabu Vêrdi nôs Bilida d´odju ê títulu di novu livru di fotógrafu Zé Pereira ki ta ser aprisentadu oji na Praia.
Aprisentasôn di trabadju ki ta ritrara diversidadi paisagistiku, sócio-kultural e biodiversidadi di tudu 10 ilha ê pa silebradia di oji – Dia Nasiunal di Kultura.
Ku 180 página e textu na purtuguês e inglês di invistigadôr kultural José Cabral, autor Zé Pereira krê mostra ma si Kabu Vêrdi ê nôs bilida d’odju nu tem ki kuida dêl dretu – tambê fotógrafu krê promôvi país enquantu distinu turístiku.
Tambê pa silebra ess Dia di Kultura ta inoguradu um bustu di Ntoni Denti D’oro, na São Dumingus.
Bustu fêtu pa skultôr Domingos Luísa stá bai podu na praça ki ta fika frenti kaza di grandi artista di txabeta e finasôn ki móri dia 26 di Sitémbru.