“Organiza um digressôn na Áfrika, um verdadêru oportunidade” ê téma di 1º konfrênsia prugramadu pa oji na âmbitu di Atlantic Music Expo.
Na 2º konferênsia di dia ta abordadu tema “Kal kê spasu na mundu di músika pa musika di mundu?” ku moderasôn di kabu-verdianu Mário Lúcio.
E kês show dêss 5ª fêra, na Rua Pedonal e na Praça Luis Camões, ki ta fitxa idisôn dêss anu di AME ê ku Beth e Patricia Carvalho, Mariama, Tiloun, Élida Almeida, Miroca Paris e Bongeziwe.
Abertura di KJF
Artista Cuca Roseta, Mário Lúcio e Simentera ta fazi oji abertura di idisôn dêss anu di Kriol Jazz Fistival, na Praça Luís Camões.
Manhãn show ta kontinua, na Praça Luís Camões, ku atuasôn di brasiléru Zeca Pagodinho.
Logu dipôs ta atua Tito Paris, El Comité e D’alma Lusa – grupu kompostu pa Anabela Aya di Angola, Karina Gomes di Guiné Bissau, Roberta Campos di Brasil, kabu-verdianu Mirri Lobo, Otis di Moçambique e Cuca Roseta di Purtugal.
Sábadu palku ê rservadu a atuasôn di Lucy Peterson di Merka, Rugaiverde kompostu pa Tiloun di Reunião e Élida Almeida, siguidu pa merkanu Stanley Clark e kabu-verdiana Mayra Andrade.
Konsidradu um di kês 25 midjôr fistivaol di mundu, pa Rivista Songlines, êss 11º idisôn ta omenagia kompusitôr Pedro Rodrigues e Daniel Rendall.
Fistival ki stá orçadu na 29 mil kontu ta pusta num cartaz kompostu essensialmenti pa artista lusófunu.