“Mário Lúcio e seus intérpretes” ê um spetákulu ki ta kuntisi oji nôti n’Auditóriu Nasiunal pa silebra 40 anu di perkursu musikal di um di kês más konseituadu kompusitor nasiunal.
Artista flá mê stá silêbra um perkursu e não um karrêra pamodi ê ká ilêgi músika komu profissão principal e aêl ê kumêsa si karrera solo a partir di 2004, mas “nha perkursu ta remonta 1979. Duranti kel tempu mi era studanti, dipôs mim era advogado, dipôs n’ trabadja na ôtus kuza…”
Pa show, Mário Lúcio kombida alguns intérprete ki grava si obra sima: Lura, Mirri Lobo, Nancy Vieira, Natty,Simentera e Tété Alhinho.
Tambê pa silebra êss quatu dékada ta enrikêsi kultura kabu-verdiana, artista ta lansa “Mário Lucio na 80 musika” – um kompilasôn di 6 disku. Kompilasôn ê, pa Mário Lúcio, frutu di txeu paixão e show stá bem ser um alimentu pa alma.
Mário Lúcio ta mostra grato ku sês intérprete. “Ê pruméru bez ki nhas interprete ta nkontra ku mim na palco. Nhas interprete e amigus di longa data (…) Ê um atu di generosidadi di sês tambê e n’ ta agradesês”.
Ê ta garanti tambê ma “stá ba ser um spetákulu bunitu. Pamodi bu stá bai obi modi ki Mirri Lobo grava Passion e bu ta obi modi ki mim n koncebêl, modi kin stá bai kantal. Pruméru bu tem oportunidade di revivi kenha ki gosta di nhas músicas kantadu pa mim e kenha ki gosta di nhas músicas kantadu pa ôtu alguém”.
Além di kêli Mário Lúcio ta considera spetákulu “um prenda. Ou seja mim oras kin ta kombida alguém n’ ta flá ‘dá bu alma um prenda’, pamodi min stá preparal na perspectiva di oras ki bu sai bu ta durmi sabi e feliz. Si bu leba bu amigo, kumpanhêra, namorado, fidju, ês ta sai kum bokadinhu más di komplitude. Pamodi alma ta precisa de alimento”.