Vindos do Mar ê pruméru grupu ofisial ki ta disfila oji kapital ku 300 figuranti, divididu na seis ala e um andor pa omenagia embaixadas akreditadu na país.
Dipôs ta entra Sambajo ku tema “Africa minha, áfrica nossa” nundi ês ta pretendi mostra stória di kontinenti, si kultura, beleza e riqueza.
Deusa do Amor ê tersêru ki ta entra vinida num omenagem a morna, num omenagem a diva di pé na txôn, Cesária Évora, siguidu pa Bloco Afro Abel Djassi ku tema Herança Afrikabu na stória di Kabu Vêrdi, pa reflecti sobri stória e kultura kabu-verdiana.
Maravilhas do Infinitu ta fazi um viagem pa mundu di sinema. Ês tem komu atrasôn stória di sinema di anus 30 ti sékulu 21 ku filmi ki lêba más txeu alguém pa sinema. E últimu ki ta entra vinida ê Vindos d’África ta fala di kriasôn di téra ti Apocalipse.
Dizistênsia
Grupu di Terra Branca, Estrelas da Marinha, ki tinha previstu fala ta fala sobri preservasôn di spési marinhu e beleza di fundu mar, disidti di disfila pamodi falta di témpu e dinhéru. Pamodi falta di dinhéru grupu fika txeu atrazadu na fazi andôr.
Són Visênti
Na Són Visênti grupu Flores do Mindelo, últimu klassifikadu di carnaval 2019, ê 1º ki ta disfila oji ku téma “Lenda di um civilizasôn mítiku”
Sugundu agremiasôn, ki dêbi entra vinida 30 minutu dipôs, ê Cruzeiros do Norte, detentôr di títulu di kampiôn di carnaval 2019, ku enredo “Tudo a dois”.
Tersêru ki ta entra na Rua di Lisboa ê Monte Sussegu, ki foi 2º klassifikadu na 2019, ku tema “Nôs terra – Mitu, kontu e lenda”.
Vindos do Oriente, ki anu passadu disisti di disfila, ê quartu grupu ki ta disfila ku enredu “Em busca da pedra filosofal”.
E últimu ki ta disfila ê Estrelas do Mar, ki konkista 3º lugar na 2019. Ê ta lêba pa vinida tema “Estrelas de Nôs Mar, tartaruga marinha”.