Na sextu idisôn di Gala Nasiunal di Disporto trabadju di basketbolista internasiunal Edy Walter Tavares rekunhesidu ku Prémiu di Altu Prestigiu.
Silesôn di atletismu ki riprisenta país na Jogos di CPLP rekunhesidu komu Persunalidadi d’Anu.
Prémiu di Artitru d’Anu bai pa Fabrício Duarte, di futiból; basketbolista Ivan Almeida konkista prémiu di Atleta Maskulinu di Diáspora e Maria Andrade, di Taekwondo, mas konshedu pa Zezinha ê Midjôr Atleta Femininu di Diáspora.
Fidel Mendonça di Basquetebol gánha prémiu di Atleta Maskulinu Residenti e Maria Correia di Andebol e Voleibol ê Atleta Femininu Risidenti.
Prémiu di Dirigênti, Trenadôr e Ikipa d’Anu bai, respetivamenti, pa Ambrósio Furtado, Lito Aguiar e Académica di Praia.
Gelson Rocha di Boxe lêba prémiu di Atleta Fair-Play, Carlos Zandonai, di atletismo, distakadu komu Jovem Promessa e Prémiu Karrêra bai pa Carlos Alfama, Rute Ferreira e Manuel Tavares.
Inda duranti Gala omenagiadu atletas di santantôn sima Luís Santos (Ciclismo), Eliseu Fortes (Atletismu) e Eder Alves (Futibol).