Kabu Vêrdi djá konkista três midalha: um di ôru e dôs di prata, na mundial Special Olimpic, Abu Dhabi 2019.
Na kumpitisôn ki stá kuntisi manênti na Emirados Árabes Unidos, kabu-verdianu António dos Santos más konshedu pa Titio ê kampiôn di mundu na 200 metru na si katiguria.
Na mesmu prova, ôtu kabu-verdianu Adérito Nunes fika na 2º lugar. Tamires Rodrigues gánha midalha di Prata na mudalidadi di 100 metru. Na mesmu katiguria kabu-verdiana Marlene Levy fika na 4º lugar.
Oji ku manhãn ôtus kabu-verdianu ta entra kumpitisôn.
Kampiunatu ki ta pretendi inklusôn susial na disportu, ki ta bai ti dia 21 dêss mês, stá partsipa serka di 7 mil atleta di 170 país na 24 mudalidadi.
Na kumpitisôn pa pessoa ku defisiênsia intelectual, Kabu Vêrdi stá riprisentadu pa atleta Adérito Nunes, António dos Santos, Tamires Rodrigues e Marlene Levy e pa trenadôr Paulo Soares e Jaqueline Reis.
Além di Kabu Vêrdi kês ôtu país ki ta streia na kampiunatu ê: Burundi, Chade, Congo, Guiné Equatorial, Etiópia, Guiné-Bissau Guiné Conacri, Lesoto, Libéria, Madagáscar, Moçambique, Níger e Sudão do Sul.