Um di kês léma di Fistival Internasiunal di Tiatru di Mindelo, Mindelact ê Ikunumia di Afetu já ki maioria di companhia ki ta bem partsipa ta paga sês passagem e inda ês ta fazi spetákulu di graça.
Keli ta mostra, di akordu ku prisidênti di Associasôn Mindelact, João Branco, ma ganhus ki Kabu Vêrdi tem ku eventu ê mutu más txeu ki invistimentu ki país ta fazi pa Fistival.
Fistival stá markadu pa kuntisi di 6 ti dia 16 di Nuvembru e abertura ê ku spetákulu “Achadiço” di grupu di tiatru nasiunal di São João di Purtugal.
Tambê stá programadu munti streia absolutu. Entri kês stréia stá peça “Manuel d’ Novas” di grupu Raiz di Polon e “Os Vivos, o Morto e o Peixe Frito”, di Grupu Juventude em Marcha. Peça li ê insenadu a partir di um texto di skritôr angulanu Ondjaki.
Inda stá na grupu di streia “O notário”, di kabu-verdianu Yuran Henrique, “Antecâmara”, di grupu kabu-verdianu um+um teatro,ku sédi na Purtugal e “Mascaradas”, di francesa Betty Tchomanga.