Idisôn di Mindelo Summer Jazz dessa nu ta kuntisi oji ku manhãn na Són Visênti em homenagem a músiku, kantôr, kompusitôr e intérpreti kabu-verdianu, Biús ki morri dia 5 d’ agosto di 2009.
Objetivu d’eventu, orçadu na serka di 15 mil kontu, ê leba pa palku stadu di spritu alegri ki Biús tinha komu músiku.
Oji abertura ta fazedu pa guitarrista mindelense Vammar Martins. Logu dipôs ta atua baixista camaronês Etienne Mbappé e pa fitxa dia di oji ta speradu ícone di jazz Maceo Parker di Merka.
Manhãn festa di jazz ta kontinua ku atuasôn di Lizandra Gomes, fidja di kabu-verdianu ki nási na Madeira, kumpanhadu pa banda nasiunal Pret & Bronk kompostu pa jovem kriolu sima Khaly Angel, Ivan Medina e Vando.
Dipôs ta atua merkanu Ron Savage Trio ki tem komu kombidada spisial Farayi Malek e encerramentu ê ku guitarrista moçambikanu, Jimmy Dlulu, um di kês referência mundial di Afro Jazz.