Silesôn nasiunal di djugadôr residênti ta viaja oji pa Dakar, Senegal, pa partsipa na Turneiu d’uniôn di Fedrasôn Oeste Africana (UFOA).
Oji tambê trenadôr di silesôn, Janito Carvalho, t’aprisenta kês 21 djugadôr ki stá sigui viaji. Duranti kês dias li ikipa tékniku stevi ta trena na kapital ku 25 djugadôr e góssi 4 tem ki fika na casa pamodi regulamentu ta permiti leba sô 21.
Kabu Vêrdi ta streia na prova, ki ta kuntisi di 28 dêss mês ti 13 d’ Outubro, dia 30 dêss mês kontra Costa d’ Marfim. Prósimu djogu di Kabu Vêrdi stá markadu pa dia 5 d’Outubru kontra Nigéria.
Tambê ta partsipa na prova silesôn nasiunal di Benin, Burkina Faso, Gâmbia, Gana, Guiné-Bissau, Guiné Conacri, Libéria, Mali, Marrocos, Mauritânia, Níger, Nigéria, Senegal e Togo.